Haf/Hydref 2001
[ Home ] [ Cysylltiadau ] [ Lluniau ] [ Newyddion ] [ Recordiau ] [ Hanes y côr ] [ Dyddiadur ] [ Lincs ]

Hâf/Hydref 2001

CÔR EIFIONYDD ar y brig unwaith eto!

Ym mis Gorffennaf daeth y Côr i’r brig mewn cystadleuaeth i gorau cymysg yng Nghwyl Fawr Aberteifi - cystadleuaeth a ddenodd saith côr cymysg o wahanol rannau o Gymru, Lloegr ac Iwerddon.  Ond uchafbwynt cystadlu i’r Côr bob blwyddyn yw’r Eisteddfod Genedlaethol, a Chôr Eifionydd aeth â hi unwaith eto mewn cystadleuaeth a ddenodd wyth o gorau cymysg o dan 40 o leisiau. Roedd y rhaglen ar gyfer y ddwy gystadleuaeth yn cynnwys darnau gan John Rutter a'r cyfansoddwr Cymreig, Brian Hughes.  Fel paratoad i'r cystadlu fe gymrodd Brian Hughes un o ymarferion y côr, ac fe ddysgodd y côr lawer am gerddoriaeth y cyfansoddwr.

Yn hwyrach ym mis Awst cawsom fel Côr wahoddiad i ganu mewn parti yng Nghastell Deudraeth i ddathlu’r agoriad, ond gan fod nifer o aelodau’r Côr, a Pat ac Ann ar eu gwyliau, cynrychiolaeth yn unig a aeth. Digon yw dweud i ni gael derbyniad ardderchog, a llais enwoca’r byd -  Bryn Terfel, yn ymuno â ni i ganu un gân, a chawsom noson i’w chofio!

Gyda chystadleuaeth hwylio y “One Ton Cup” ar ein stepan drws ni ar ddechrau mis Medi, cafodd y Côr wahoddiad i ganu mewn derbyniad i groesawu’r gystadleuaeth yn swyddogol i Ben Llyn a chaswom groeso twymgalon iawn.

Bu ein cyngerdd mawreddog yn Neuadd Goffa Cricieth, ym mis Medi pan berfformiwyd rhannau o Meseia, Handel gyda Cherddorfa Siambr Gogledd Cymru, a’r unawdwyr sef Sian Eirian (soprano), Helen Medi (alto), Ian Rees (tenor) ac Aled Edwards (bas).  Dyma’r cyngerdd mawreddog oedd wedi ei drefnu’n wreiddiol ar gyfer mis Mawrth eleni, ond oherwydd clwy’ traed a’r genau bu raid i ni ohirio’r cyngerdd lansio.   Cafodd y  cyngerdd ei recordio ar gyfer ei ddarlledu ar Radio Cymru o gwmpas y Nadolig, ac roedd yr ymateb gan y gynulleidfa i’r Côr, y Gerddorfa, ac yn arbennig i’r unawdwyr gwadd yn wych.  Yn sicr roedd yn brofiad arbennig cael bod yn rhan o gyngerdd mor safonol.