Hanes Segofia
[ Home ] [ Cysylltiadau ] [ Lluniau ] [ Newyddion ] [ Recordiau ] [ Hanes y côr ] [ Dyddiadur ] [ Lincs ]

Trip i Segofia!

Mae Eifionydd ar y map!  Wel o leiaf mae pobl ardal Segofia,  Sbaen yn gwybod mwy am Eifionydd a Chymru ers ein hymweliad â’r ardal brydferth hon.  Tref hynafol yw Segofia, sydd tua awr a hanner o daith o faes awyr Madrid, lle'r hedfanodd tua 32 ohonom ar Hydref 20ed am dair noson fel gwesteion i gôr cymysg o'r ysgol gerdd leol.

Cawsom westy  hyfryd a chroeso twymgalon a llond trol o hwyl, o ia, buom yn canu rhyw gymaint hefyd!  Roedd dau gyngerdd “swyddogol”, wedi eu trefnu - y cyntaf mewn eglwys fechan a oedd yn rhan o'r palas brenhinol La Granja de San Ildefonso. Cawsom groeso swyddogol gan Faer y dref i La Granja.

Palas La Granja gyda'r eglwys yng nghanol y llun

Roedd yr ail gyngerdd mewn eglwys hynafol yn nhref Segofia ei hun - Iglesia de San Justo.  Roedd ymateb y gynulleidfa i’r cyngherddau yn gynnes a chroesawus iawn, ac roedd yn amlwg i’r trefnwyr weithio’n galed iawn gyda’r cyhoeddusrwydd o flaen llaw gan bod posteri gyda llun y Côr arnynt wedi eu plastro ar bob wal yn Segofia, ac, yn ôl y sôn,  mae ein lluniau wedi bod yn y wasg leol ar ôl i ni adael (yn ein canmol wrth gwrs)!

Rhai aelodau o'r côr hefo'r posteri oedd wedi ei rhoi o gwmpas y dref.

Cawsom gyfle i weld tipyn ar Segofia a’r ardal tra yno, a bore rhydd (i siopa i rai) yn Madrid cyn hedfan adre.  Er bod y daith wedi bod yn un byr bu’n un hynod o bleserus a hwyliog  iawn, diolch i drefniadau Ian a Wendy Rees ac rwy’n sicr y bydd sôn am y daith yma yn Eifionydd ac yn Segofia am amser maith. 

Yr aquaduct fawr yng nghanol Segovia

Segovia